Carita Kaulinan Barudak: Perepet Jengkol

Barudak lalaki keur ngarangon embé jeung domba di tegalan. Pandu keur diuk dina tunggul nangka. Leungeunna ngeukeuweuk tambang domba. Beulah kiduleun Pandu, katémbong Ulun keur nyabetan tangkal pungpurutan. Ari di lebak, Rangga keur luluncatan mapay-mapay catang kalapa anu rungkad. Tukangeunana Déla nuturkeun, leungeunna ranggém nyekel kulub siki nangka.

"Lun, domba manéh geus buncir?" Pandu ngagorowok ka Ulun.

Ulun ngalieuk sakeudeung, rét nempo beuteung dombana. 

"Enggeus. Tuh, mani mutiktrik kitu!" témbal Ulun.

"Domba kuring ogé geus buncir. Urang ampihkeun yu!" ceuk Pandu bari nungtun dombana nyampeurkeun ka Ulun.

"Beurang kénéh, bisi ngambek Abah," témbal Ulun. Manéhna anteng nyabetan tangkal pungpurutan. "Mending cangcang wé di dieu!" pokna deui.

Keur kitu, torojol Rangga jeung Déla nyampeurkeun. Déla samutut da keur ngadahar kulub siki nangka.

"Ménta abi, La!" ceuk Ulun bari cengkat.

"Yeuh, opat siki séwang!" Déla ngabagikeun kulub siki nangka bekelna.

"Nya teu ngangon, La?" tanya Ulun. Pipina rempih ku siki nangka.

"Dipangaritkeun nu kuring mah," témbal Déla. 

"Ari nu Rangga?" ceuk Pandu ka Rangga.

Rangga teu némbalan, kalahka gék diuk dina batu. 

"Nu Rangga mah dijual ku bapana." Déla mangnémbalankeun.

"Har, nya keur naon?" Pandu héraneun. Manéhna neuteup ka Rangga.

"Teuing. Ceuk Ema mah dipaké ngalunasan hutang kenténg cenah." Rangga ngaheruk.

Barudak teu ngaromong deui. Maranéhna angger cacamuilar ngadaharan kulub siki nangka téa.

"La, moal waka balik?" ceuk Ulun.

"Moal," témbal Déla.

"Urang pérépét jéngkol atuh yu!" Ulun ngajakan. 

"Hayulah!" Pandu nangtung, tuluy miceunan tangkal pungpurutan.

"Tah, lénglang kieu mah!" Déla ngajleng ka tengah palataran.

"Yap ka dieu atuh, Rangga!" Ulun ngagupayan Rangga. 

Barudak laleumpang ka nu rada datar. Terus ngariung pahareup-hareup.

"Kuring anu ngomandona nya!" ceuk Pandu. "Sok patonggong-tonggong, leungeun silihcekel!" pokna deui. 

Ulun, Rangga, jeung Déla narurut. Leungeunna pacekel-cekel.

"Sok suku téh kaitkeun kana cécékolan kuring!" Pandu nitah ka Rangga. Sukuna diasongkeun ka tengah, ari awakna tetep nonggongan.

Sup, suku Rangga dikaitkeun. Pandu jeung Rangga sukuna geus pacantél. Atuh, maranéhna jadi napak sabeulah.

"Suku Ulun kaitkeun kana cécékolan Rangga!" Pandu ngarérét ka Ulun.

Ulun gancang ngaitkeun sukuna sabeulah. Manéhna éngklé. 

"Terus colokkeun, ti suku kuring kana suku Rangga!" Pandu maréntah deui.

Barudak patingrampayak rék lalabuh. Awakna rual-réol. sakapeung éngklé-éngkléan.

"Awas, tong aya nu labuh! Muntangna sing pageuh!" Ulun nyorowok.

"Aduh, nyeri suku kuring mah!" Déla nyengir.

"Éta da, suku Déla mah urut maén bal nya?" ceuk Pandu. "Awas, siap...!" pokna deui.

"Muterna ka kénca heula!" ceuk Ulun.

"Ih, répéh atuh! Pan kuring anu jadi komandanna," ceuk Pandu bari seuri.

"Siap, muter ka kénca bari éngklé! Leungeun nyekel sing pageuh!" Pandu ngagorowok.

Barudak muter bari teu reureuh ngawih. Ari kawihna téh kieu:

Pérépét jéngkol jajahéan,

kadempét kohkol jéjérétéan. 

Pérépét jéngkol jajahéan, 

kadempét kohkol jéjérétéan.

Barudak raeng ngarawih bari teu reureuh saleuseurian. Awakna terus muter bari éngklé-éngkléan.

"Aduh, suku abi nyeri pisan!" Déla ngocéak.

Barudak eureun muterna, sukuna dilalésotkeun.

"Wah, mani getihan kitu!" Pandu ngaragap suku Déla.

Déla luwa-lewé rék ceurik.

Sumber: Kaulinan Barudak Lembur 

makin tahu indonesia